Handb: J14 klar for 1. divisjon etter nyttår

Haugen – Dale: 8 – 18 
Breimsbygda – Dale: 2 – 18

Spelarar: Åsta Johanne S. Sætenes, Martine Håland, Kjerstin Boge Solaas, Jeanette Myklebust Øksenberg, Kjersti Hovland, Sara Eikevik Dyrstad, Ota Garre-Fivelsdal, Marte Huseklepp, Tuva Garre-Fivelsdal, Astrid Solheim, Margrete Svardal og Ronja Helle.  

Det var duka for ein kjekk (og lang) handballdag for Dale sitt j.14-lag laurdag 26.november. Opplegget var hektisk og nøye planlagt: første kamp mot Haugen på Eid, for deretter å springe i bilen for å rekke ferja til Sandane, der kampen mot Breimsbygda skulle spelast. Vi hadde ikkje meir tid enn vi trengde, så når vi fekk beskjed om forseinkingar på Eid, vart trenar og sjåførar lettare stressa. Jentene tok det knusande med ro, og konsentrerte seg mest om kampen motdåverande tabelleiar Haugen. Kampen kom endeleg i gong, men laga brukte nokre minutt på å komme skikkeleg i gong. Dalejentene viste mange og flotte redningar, imponerande forsvarsspel og eit angrepspel med høgt tempo, fantastiske finter og gode avslutningar. Jentene rista etter kvart av seg all respekt dei hadde for Haugen-spelarane, og målskilnaden mellom laga fortsette å auke. Dale gav seg ikkje før det stod 8-18 på tavla, noko som vi var særs godt nøgde med.
Vi kom oss raskt i bilane og rakk ferja (vi måtte til og med vente litt!).
Etter litt mat og den andre oppvarminga for dagen, var vi klare for ny kamp. Denne gongen var det det laget i den andre enden av tabellen som var motstandar. Underteikna var litt bekymra for konsentrasjonen til jentene ettersom den første kampen hadde gått over all forventning. Kunne vi klare å halde oppe tempoet, presisjonen og konsentrasjonen? Eg slapp heldigvis å bekymre meg lenge, for jentene fortsatte med storspelet sitt. Sluttresultatet vart heile 2-18.
 
Med 4 poeng og 10-36 i målskilnad reiste vi heimover, utruleg nødge med kampane. Med ein svært imponerande redningsstatistikk for dei to keeperane våre, eit forsvarsspel som bestod av solide taklingar (og ein god del blåmerker for motstandarane), og finter og avslutningar som var upåklagelege, kan jentene ta kamp-juleferie med god samvit.
 
Fleirtalet av jentene har vore på scoringslista i fleire kampar (denne dagen var ingen unntak), og dette er sjølvsagt motiverande og kjekt, både for spelarar og trenarar. Laget har utvikla seg til eit kollektivt lag, der alle spelarane gjer ein heiderleg og viktig innsats i kvar kamp! Vi går utan tvil ein spanande ”del 2” av handballsesongen i møte, der vi skal spele mot dei beste laga i aldersklassen. 

Det gler vi oss stort til!! 🙂 🙂